دیدے اب ایک حسیں نیک سی دختر مجھ کو - نون میم

طرحی مشاعرہ ۔۔۔ محبانِ اردو گروپ

طرحی مصرعہ :

‌" کوئی دیتا ہے صدا دور سے اکثر مجھ کو ‌"

..............................

اب نہ بھائے کوئی محفل کوئی منظر مجھ کو

‌" کوئی دیتا ہے صدا دور سے اکثر مجھ کو ‌"

کوئی ترکیب نئی ڈھونڈ لے اب تو جانم

تیری ہر چال ترا وار ہے ازبر مجھ کو

ایک دن آئے گا، ہاں آئے گا، ہاں آئے گا

اپنی الفت کا بنا لے گا وہ محور مجھ کو

سنگِ اسود میں بھی کیا رب نے اثر رکھا ہے

ایک بوسے سے بنا دے وہ منور مجھ کو

نعمتیں لاکھ عطا کی ہیں مرے رب تُونے

دیدے اب ایک حسیں نیک سی دختر مجھ کو

میری اوقات نہیں پھر بھی بنا دے یارب

میرے آقاﷺ کے غلاموں کا ہی نوکر مجھ کو

میں نے جب نوؔر کہی دل کی لگی دنیا سے

اہلِ دنیا تو سمجھ بیٹھےسخن ور مجھ کو

............ ............

نُون میم : نوؔرمحمد ابن بشیر

کوسہ، ممبرا، تھانہ ، الہند

بتاریخ. ٤ جمادی الآخر ١٤٣٧ ھ ۔۔14 فروری 2016

............ ............ ............ ......